مش فهمة خالص

[vbadmin]

بواسطة/ مش فاهمة حاجة

انا كده على طول نفسى اعمل حاجة نفسى فيها ونفسى اخد حاجة عايزاها واتمنتها يوم !!
من ثانوى عام وبابا كان بيخلينى اخد دروس عند مدرسين مش بحبهم ولما وصلت للكلية بابا هو اللى اخترهالى ومع ذلك رضيت وحبيت الكلية وكملت صحيح كان صعب شوية ووقعت سنة بس بعد كده كملت عادى وقابلت زميلى فى الكلية بس بصراحة كنت عادى ولا بحبه ولا بكره بس هو حبنى جدا ومع ذلك كان عنده شوية مشاكل خاصة بيه فأهلى ما وافقوش عليه وانا بعد كده لقيت فيه عيوب كتير وكبرت دماغى منه وعادى
بس جيت بعد كده والحمد لله قربت من ربنا جدا وكنت مبسوطة اوى وفى سنة رابعة اخدت بالى من زميل ليا فى الدفعة غصب عنى اتعلقت بيه وكنت معجبه بيه جدا ومتابعة اخباره على طول وكنت دايما ببص عليه وهو كمان كان بيبص لى كتير بس مكنش فيه كلام بينا لانى مكنتش بكلم ولاد ولا هو لانه ملتزم كان عارف اسمى طبعا وانا كمان بحكم اننا فى سنة واحدة ، كان بيقرأ علينا قران بين المحاضرات ويعمل مسابقات دينية ويوزع جوايز رمزية وجت امتحانات سنة رابعة لقيته نزل ورق المواد كلها بخط ايده وكتب رقم تليفونه فى الورق كله ، وطبعا اخدت النمرة وشلتها معايا .
كان معايا واحدة صحبتى الله يسامحها بقى كانت مخطوبة وخطيبها مسافر واقترحت عليا ان لما خطيبها يرجع تكلمه فى الموضوع ده وتديله النمرة وتخليه يكلمه ويتعرفوا على بعض فى الاول رفضت وقلت لها بلاش
بس هى صممت واقنعتنى ووافقت لانى عايزاه من جوايا بصراحة ومش عايزاه يضيع منى ، والفكرة اتنفذت بالفعل
ومرة كان خطيبها بيتصل بيه لقى موبايله مقفول على طول ولما جرب من اى نمرة تانية كان بيسمع جرس عادى
عرفنا ساعتها انه حاطط نمرة خطيب صحبتى فى قايمة التجاهل لان خطيبها قاله ان خطيبته دى اللى تبقى صحبتى وهو طبعا عارفنى وواخد باله انى كنت ببص له على طول وطبعا فهم انى انا صاحبة الفكرة دى وانا اللى بجرى وراه وطبعا كنت رخيصة فى نظره اوى وده كان واضح فى رد فعله مع خطيب صحبتى وتجاهله ليه بعد ما عرف انه تبعى !!
بصراحة زعلت جدا ودمى اتحرق ولقيت نفسى بتصل بيه وعرفته بنفسى وشكرته جدا لانه أثر فيا وفى شخصيتى
وكان سبب فى انى اقرب من ربنا وحتى وانا فى الكلية كنت بزاكر من الورق بتاعه وهو كان بيكلمنى عادى الصراحة وحاولت أفهمه سوء التفاهم اللى حصل وقلت له انى اتحطيت ادام الامر الواقع زيه ومش انا صاحبة الفكرة دى الكلام ده كان تقريبا من شهر وبعدها ما حصلش جديد
المشكلة دلوقتى انى متعلقة بيه اوى وشايفة فيه فارس احلامى غصب عنى ولله العظيم بس مش فاهمة حاجة حاسة ان الموضوع باظ خلاص وانى مش فى دماغه اصلا ، بفكر فيه كتير واشتغلت وبحاول أشغل وقتى والحمد لله بصلى وبذكر الله كتير وبقرأ قران أحيانا كل ده علشان ما أفكرش فيه وبرضه مفيش فايده وجالى أكتر من عريس من ساعة ما أتخرجت لدلوقتى وأقسم بالله العظيم ببقى مش طايقاهم ومش عارفة اوصف لكم احساسى بيبقى عامل أزاى
بدعى ربنا كتييييييييير ومفيش جديد !! يا ترى انا فعلا كنت رخيصة فى نظره وصحبتى هى السبب فى كده؟
على فكرة صحبتى دى العلاقة بينى وبينها اتقطعت نهائى هى كانت عاملة متدينة بس بصراحة الحق يتقال انا شايفة انها مش كده اصلا كانت و خدانى مصلحة أزاكر لها وأعزمها وأوصلها يعنى حاجة كده مؤقتا لحد ما خطيبها يرجع
حتى كانت بتقولى انتى بتفكرينى بيه فى تفكيره وطريقه كلامه !!
وكان خاطب قبلها واحدة وكانت بتخرج معاه وهو فى ايده دبلة البنت التانية دى وبعدين سابها وخطب صحبتى قصدى اللى كانت صحبتى وباباها ملتزم ويوم قراية فتحتها هو اللى لبسها الشبكة وطبعا كانت بتخرج مع خطيبها من ورا أبوها ولا تعليق .
حتى انا رحت لها قراية فتحتها من ورا ماما علشان أرضيها لان ماما مكنتش موافقة لانها ساكنة بعيد عنى جدا
بس اكتشفت انى ضحيت علشان واحدة ولله ما تستاهل وحسبى الله ونعم الوكيل فيها.
أنا حاسة بالعجز والحرمان وانى مش قادرة اعمل اى حاجة نفسى فيها ولا قادرة أوصل لاى هدف حطيته لنفسى
ولا حتى عارفة أختار صح ولا صديق ولا حبيب
،بجد مش فاهمة حاجة ؟!